Mute

ساڵێكی‌ سه‌خت‌و پڕ گۆڕانكاریی‌

موستەفا حەبیب | بەغدا

له‌2016دا عێراقیه‌كان ساڵێكی سه‌ختی دیكه‌یان تێپه‌ڕاند، توندوتیژی‌و راگواستن‌و شه‌ڕی سه‌خت‌و شاری وێرانه‌و قه‌یرانی سیاسی بێ كۆتایی، به‌ڵام له‌گه‌ڵ ئه‌وه‌شدا خاڵی نه‌بوو له‌و كاته‌ خۆشانه‌ی به‌شێكیان پێكه‌نیناوی بوون.

 

نیقاش له‌م بابه‌ته‌دا چه‌ند رووداوێكی دیاری ده‌ستنیشان كردووه‌ كه‌ عێراق له‌ 2016دا له‌ڕووی سیاسی‌و ئه‌منی‌و ئابووری‌و كۆمه‌ڵایه‌تیه‌وه‌ تێیدا ژیا




خۆپیشاندان دژی له‌سێداره‌دانی ئه‌لنه‌مر

له‌ 4ی كانونی دووه‌مدا هه‌زاران عێراقی له‌باشووری وڵات خۆپیشاندانی به‌رفراوانیان رێكخست له‌دژی له‌سێداره‌دانی كه‌سایه‌تی ئایینی شیعه‌ی سعودی نه‌مر ئه‌لنه‌مر له‌لایه‌ن ده‌سه‌ڵاتدارانی سعودیه‌وه‌ له‌دووی كانونی دووه‌مدا. گروپه‌ شیعه‌كانی ناو "حه‌شدی شه‌عبی" داوای ئه‌و خۆپیشاندانانه‌یان كردبوو كه‌ له‌به‌غداو كه‌ربه‌لاو به‌سره‌و ناسریه‌ به‌ڕێوه‌چوون، خۆپیشانده‌ران دروشمی دژ به‌سعودیه‌یان به‌رزكردبۆوه‌، هاوكات چه‌ند په‌رله‌مانتارو سیاسیه‌كی عێراقی داوایان كرد سامر ئه‌لسه‌بهان باڵیۆزی سعودیه‌ له‌به‌غدا ده‌ربكرێت كه‌ به‌كرده‌وه‌ش دوای پێنج مانگ له‌سه‌ر داوای وه‌زاره‌تی ده‌ره‌وه‌ی عێراق وه‌ك ناڕه‌زاییه‌ك له‌دژی لێدوانه‌كانی باڵیۆز له‌باره‌ی دۆسێی سه‌ربازی له‌عێراق وازی له‌ئه‌ركه‌ دیپلۆماسیه‌كه‌ی هێنا.





نمایشی جلوبه‌رگ له‌نێو فه‌وزاد

له‌ 12ی ئازاردا دوای چه‌ندین ساڵ یه‌كه‌م نمایشی جلوبه‌رگ له‌عێراق له‌یه‌كێك له‌هۆتێله‌كانی به‌غدای پایته‌خت له‌ژێر ناوی "Baghdad Fashion Show" به‌به‌شداری نمایشكارو دیزاینه‌رانی عێراقی له‌ئاهه‌نگێكدا رێكخرا كه‌ تۆڕه‌ كۆمه‌ڵایه‌تییه‌كان به‌شێوه‌یه‌كی به‌رفراوان باسیان كردو بیره‌وه‌ری رابردووی گه‌ڕاندنه‌وه‌ بۆ ئه‌و كاته‌ی چه‌ند ده‌یه‌یه‌ك به‌ر له‌ئێستا نمایشی جلوبه‌رگ‌و فێستیڤاڵ نه‌ریتێكی به‌ربڵاو بوو.

ا

 




گه‌ل له‌ناو په‌رله‌ماندا

له‌ 30ی نیساندا به‌هه‌زاران خۆپیشانده‌ر له‌لایه‌نگرانی كه‌سایه‌تی ئاینی موقته‌دا سه‌در هه‌ڵیانكوتایه‌ سه‌ر ناوچه‌ی سه‌وزی قایمكراو به‌به‌ربه‌رستی كۆنكرێتی‌و چوونه‌ نێو بینای په‌رله‌مان كه‌ رۆژێكی مێژوویی بوو بۆ چه‌ند ساڵێك له‌بیره‌وه‌ری عێراقییه‌كاندا ده‌مێنێته‌وه‌، خۆپیشانده‌ران له‌ناو بینا حكومیه‌كاندا ده‌سوڕانه‌وه‌و وێنه‌ی یادگاریان به‌دانیشتن له‌ناو هۆڵی ئه‌نجومه‌نی نوێنه‌ران‌و له‌سه‌ر كورسی سه‌رۆك‌و له‌باخچه‌كانی نزیك ئه‌و ناوه‌ ده‌گرت، هه‌ڵكوتانی خۆپیشانده‌ران بۆ سه‌ر په‌رله‌مان دوای ئه‌و خۆپیشاندانانه‌ هات كه‌ چه‌ند هه‌فته‌یه‌ك به‌رده‌وام بوون‌و تێیدا سه‌در داوای له‌حكومه‌ت‌و په‌رله‌مان كرد چاكسازی سیاسی جێبه‌جێ بكه‌ن‌و حكومه‌تێكی نوێ له‌كه‌سانی به‌توانای غه‌یره‌ حزبی پێكبهێنن، سه‌در دووجار به‌شداری له‌خۆپیشاندانه‌كاندا كردو له‌ده‌روازه‌ی ناوچه‌ی سه‌وز خێمه‌یه‌كی هه‌ڵداو چه‌ند رۆژێكی تێدا به‌سه‌ربرد.




 

قه‌نه‌فه‌كه‌ی په‌رله‌مان

 

له‌سه‌ره‌تای ئایاریشدا هه‌ڵمه‌تێكی گاڵته‌ئامێز له‌تۆڕه‌ كۆمه‌ڵایه‌تییه‌كان به‌ناوی "قه‌نه‌فه‌كه‌ی په‌رله‌مان" ده‌ستیپێكرد كه‌ چیرۆكه‌كه‌ی ده‌گه‌ڕێته‌وه‌ بۆ سه‌ردانێكی هه‌ریه‌ك له‌حه‌یده‌ر عه‌بادی سه‌رۆك وه‌زیران‌و سه‌لیم جبوری سه‌رۆكی په‌رله‌مان بۆ بینای په‌رله‌مان له‌دوای چوونه‌ ده‌ره‌وه‌ی خۆپیشانده‌رانی توڕه‌، ئه‌ویش به‌مه‌به‌ستی ئاگاداربوون له‌و زیانانه‌ی به‌هۆی خۆپیشانده‌رانه‌وه‌ لێی كه‌وتبوو، واش رێكه‌وت كه‌ جبوری‌و عه‌بادی سه‌ردانی یه‌كێك له‌هۆڵه‌كانی په‌رله‌مانیان كرد كه‌ قه‌نه‌فه‌یه‌كی سپی تێكشكاوی تێدابوو، دواتر عێراقیه‌كان چه‌ندین هاشتاگیان ده‌ستپێكرد كه‌ گاڵته‌كردن بوو به‌بایه‌خدانی سیاسیه‌كان به‌قه‌نه‌فه‌یه‌ك له‌بری داواكاریه‌كانی گه‌ل.






ئاڵای ئێران له‌شه‌قامه‌كانی به‌سره‌دا

له‌ 6ی ئایاردا ژماره‌یه‌ك عێراقی به‌ئۆتۆمبێله‌كانیان له‌شه‌قامه‌كانی پارێزگای به‌سره‌ی باشووری وڵات سووڕانه‌وه‌و ئاڵای ئێرانیان به‌رزكردبووه‌وه‌

بۆئه‌وه‌ی سوپاسگوزاری پێشكه‌ش به‌ئێران بكه‌ن له‌پای یارمه‌تیدانی عێراق له‌شه‌ڕی دژ به‌داعشدا، به‌ڵام ئه‌و گرته‌ ڤیدیۆیی‌و وێنانه‌ی له‌ تۆڕه‌ كۆمه‌ڵایه‌تییه‌كان

سه‌باره‌ت به‌رووداوه‌كه‌ بڵاوبوونه‌وه‌، توڕه‌یی چه‌ندین عێراقی‌و یه‌كتر تۆمه‌تباركردنی نێوان لایه‌نگرو به‌رهه‌ڵستكارانی لێكه‌وته‌وه‌.



ئازادكردنی پایته‌ختی یه‌كه‌می داعش

به‌یانی 17ی حوزه‌یران عێراق سه‌ركه‌وتنێكی ره‌مزی گه‌وره‌ی به‌ده‌ستهێنا كاتێك حه‌یده‌ر عه‌بادی سه‌رۆك وه‌زیران ئازادكردنی شاری فه‌لوجه‌ی پایته‌ختی یه‌كه‌می داعشی له‌عێراق راگه‌یاند كه‌ توندڕه‌وه‌كان شه‌ش مانگ به‌ر له‌ موسڵ داگیریان كردبوو، دوای ئۆپراسیۆنێكی سه‌ربازیی كه‌ 24 رۆژی خایاند هێزه‌ هاوبه‌شه‌كانی سوپاو پۆلیسی فیدراڵی‌و "حه‌شد شه‌عبی" توانیان شاره‌كه‌ به‌ته‌واوی كۆنترۆڵ بكه‌ن‌و توندڕه‌وه‌كانی لێ ده‌ربكه‌ن، به‌ڵام ئه‌و پێشێلكاریانه‌ی گروپه‌كانی "حه‌شدی شه‌عبی" له‌دژی دانیشتووانی بێتاوان‌و هه‌ڵاتوو له‌ئۆپراسیۆنه‌ سه‌ربازییه‌كان ئه‌نجامیاندا، خۆشی سه‌ركه‌وتنه‌كه‌ی تێكدا، چونكه‌ زیاتر له‌ 650 كه‌س دیارنه‌مان‌و تائێستاش چاره‌نووسیان نه‌زانراوه‌و به‌ده‌یان كه‌سی تریش به‌ده‌ستی چه‌كدارانی شیعه‌ كوژران یان ئه‌شكه‌نجه‌دران.

 

 

 

 

 

 

 

رۆژی دڵته‌نگی عێراقی

سه‌عات یه‌كی به‌ره‌به‌یانی 3ی ته‌مموز ناوچه‌ی كه‌ڕاده‌ی سه‌نته‌ری به‌غدای پایته‌خت ته‌قینه‌وه‌یه‌كی ترسناكی به‌خۆوه‌ بینی له‌ڕێی ئۆتۆمبیلێكی بۆمبڕێژكراو كه‌ سێ رۆژ به‌ر له‌جه‌ژنی ره‌مه‌زان كۆمه‌ڵگه‌ی بازاڕه‌ بازرگانیه‌ پڕ له‌كڕیاره‌كانی كرده‌ ئامانج‌و بووه‌ هۆی كوژران‌و برینداربوونی زیاتر له‌300 كه‌س‌و به‌هێزترین ته‌قینه‌وه‌ بوو وڵات له‌دوای 2003 به‌خۆوه‌ی ببینێت، ئیتر دڵته‌نگی هه‌موو شاره‌ عێراقیه‌كانی گرته‌وه‌ زۆرینه‌ی خه‌ڵكیش رازی نه‌بوون جه‌ژن بكه‌ن له‌به‌ر دڵته‌نگیان بۆ قوربانیانی ئه‌و ته‌قینه‌وه‌یه‌ی كه‌ تۆڕه‌ كۆمه‌ڵایه‌تیه‌كان وێنه‌و لێدوانه‌ دڵته‌نگانه‌كانی ده‌ستاوده‌ست پێده‌كردن. "داعش" به‌رپرسیارێتی خۆی له‌ته‌قینه‌وه‌كه‌ راگه‌یاند، هاوكات په‌رله‌مان‌و حكومه‌تیش لیژنه‌ی لێكۆڵینه‌وه‌و قه‌ربووكردنه‌وه‌ی دانیشتوانی زیانلێكه‌وتوویان پێكهێناو شوێنی ته‌قینه‌وه‌كه‌ش بووه‌ مه‌زارگه‌ی هه‌زاران عێراقی بۆ مۆم داگیرساندن.

 









 

 

 

 

 

ته‌قینه‌وه‌كه‌ی‌ كه‌راده‌ یه‌كێك بوو له‌سه‌ختترین رووداوه‌كانی‌ ساڵ، به‌ئه‌ندازه‌یه‌ك خوێنی‌ تیا رژا كه‌ چه‌ند ساڵێكه‌ عێراق كاره‌ساتی‌ وا قورسی‌ به‌خۆوه‌ نه‌دیوه‌










 

وه‌زیری به‌رگری بۆمبێك ده‌خاته‌ ناو په‌رله‌مان

 

له‌ دانیشتنێكی جێمشتومڕی په‌رله‌ماندا كه‌ 1ی ئابی ئه‌مساڵ به‌ڕێوه‌چوو، خالید عوبه‌یدی وه‌زیری به‌رگری عێراق كارێكی چاوه‌ڕواننه‌كراوی كردو به‌ئاشكرا سه‌لیم جبوری سه‌رۆكی په‌رله‌مان‌و هه‌ردوو په‌رله‌مانتار محه‌مه‌د كه‌ربولی‌و تاڵب میعماری به‌گه‌نده‌ڵی ئیداری‌و دارایی تۆمه‌تبار كرد، كه‌ ئه‌وه‌ش بۆ یه‌كه‌مجار بوو رووداوێكی له‌و شێوه‌یه‌ له‌نێوان سیاسیه‌كاندا رووبدات‌و تێیدا راسته‌خۆو به‌بێ دیپلۆماسیه‌ت یاخود له‌پشتی په‌رده‌وه‌ قسه‌ له‌نێو خۆیاندا بكه‌ن، دوای كۆتاییهاتنی دانیشتنه‌كه‌ش عوبه‌یدی بووه‌ پاڵه‌وانێكی نیشتمانی له‌چاوی عێراقیه‌كانداو پشتیوانیان بۆ راگه‌یاند، به‌ڵام رێككه‌وتنێكی سیاسی نهێنی له‌نێوان حزبه‌كانی شیعه‌و سوننه‌دا بووه‌ هۆی له‌كارلابردنی عوبه‌یدی له‌پۆسته‌كه‌ی‌و بێده‌نگكردنی.


 







 

 

 

عێراق پاڵه‌وانی ئاسیایه‌

له‌ 2ی تشرینی یه‌كه‌مدا هه‌ڵبژارده‌ی تۆپی پێی عێراق له‌سه‌ر ئاستی تازه‌پێگه‌یشتووان بۆ یه‌كه‌مجار له‌مێژوویدا پاڵه‌وانێتی جامی ئاسیای به‌ده‌ستهێنا دوای ئه‌وه‌ی له‌یاری كۆتاییدا له‌هه‌ڵبژارده‌ی ئێرانی برده‌وه‌، عێراقیه‌كانیش به‌خۆشحاڵیه‌وه‌ پێشوازیان له‌هه‌واڵی بردنه‌وه‌كه‌ كردو ئه‌م هه‌واڵه‌ خۆشه‌ بۆ ماوه‌یه‌ك له‌هه‌واڵه‌ ئه‌منی‌و سیاسیه‌ نه‌رێنیه‌كانی دوورخستنه‌وه‌ كه‌ بۆ چه‌ند مانگێك یاوه‌ریانبوون.

 

 

 

ماڵئاوایی له‌ "هونه‌رمه‌ندی گه‌ل"

له‌ 10ی تشرینی یه‌كه‌مدا عێراقیه‌كان ماڵئاواییان له‌هونه‌رمه‌ندی گه‌وره‌ یوسف ئه‌لعانی كرد دوای ئه‌وه‌ی له‌یه‌كێك له‌نه‌خۆشخانه‌كانی ئوردن به‌ نه‌خۆشی كۆچی دوایی كرد، حكومه‌تیش رێوڕه‌سمێكی شوكۆداری بۆ هێنانه‌وه‌ی ته‌رمه‌كه‌ی رێكخست هه‌ر له‌گه‌یشتنیه‌وه‌ بۆ فڕۆكه‌خانه‌ی به‌غدا تا به‌خاكسپاردنی. ئه‌لعانی به‌یه‌كێك له‌ مه‌زنترین هونه‌رمه‌نده‌ شانۆكاره‌كان له‌عێراق داده‌نرێت‌و له‌سه‌ر ئاستی میللی به‌ نازناوی "هونه‌رمه‌ندی گه‌ل" ناسراوه‌و له‌ ساڵی 1927 له‌ئه‌نبار له‌دایكبووه‌و وه‌ك شانۆكارو ئه‌كته‌رو ده‌رهێنه‌ر كاری كردووه‌و له‌ حه‌فتاكانی سه‌ده‌ی رابردووشدا هونه‌ری له‌ئه‌ڵمانیا خوێندووه‌.

 

 



له‌مڕۆ به‌دواوه‌ مه‌ی نامێنێت

له‌ 22ی تشرینی یه‌كه‌مدا په‌رله‌مانی عێراق ده‌نگی له‌سه‌ر یاسایه‌كی جێ مشتومڕدا كه‌ به‌ته‌واوی هاورده‌كردن‌و دروستكردن‌و فرۆشتنی خواردنه‌وه‌ كحولیه‌كان قه‌ده‌غه‌ ده‌كات ئه‌مه‌ش بووه‌ مایه‌ی نیگه‌رانی كه‌مینه‌ ئاینیه‌كان له‌عێراق به‌تایبه‌تی مه‌سیحیه‌كان هه‌روه‌ها موسڵمانه‌كانیش كه‌ یاساكه‌یان به‌دیكتاتۆری‌و ئامانج لێی سه‌ركوتكردنی ئازادیه‌ تایبه‌ته‌كان له‌قه‌ڵه‌مدا، هه‌روه‌ها په‌رله‌مانتار مه‌حمود ئه‌لحه‌سه‌ن له‌فراكسیۆنی "ده‌وڵه‌تی یاسا" كه‌ یاساكه‌ی گه‌ڵاڵه‌ كردبوو له‌لایه‌ن عێراقیه‌كانه‌وه‌ له‌تۆڕه‌ كۆمه‌ڵایه‌تییه‌كان رووبه‌ڕووی شه‌پۆلێكی به‌رفراوانی ناڕه‌زایی بووه‌وه‌، فوئاد مه‌عسوم سه‌رۆك كۆماریش ره‌تكردنه‌وه‌ی یاساكه‌ی راگه‌یاندو گه‌ڕاندیه‌وه‌ بۆ په‌رله‌مان تابه‌پێی ده‌ستوور هه‌موار بكرێت.






 

سه‌ختترین شه‌ڕ له‌دژی تونده‌ڕه‌وان

 

له‌ 17ی تشرینی یه‌كه‌م (ئۆكتۆبه‌ر)دا حكومه‌تی عێراق هه‌ڵمه‌تێكی سه‌ربازی فراوانی بۆ كۆنترۆڵكردنه‌وه‌ی شاری موسڵ ده‌ستپێكرد كه‌ دووساڵ له‌مه‌وبه‌ر ئه‌بوبه‌كر به‌غدادی سه‌ركرده‌ی داعش له‌و شاره‌وه‌ "ده‌وڵه‌تی خه‌لافه‌ت"ی له‌یه‌كێك مزگه‌وته‌كانیه‌وه‌ راگه‌یاند، هێزه‌ ئه‌منیه‌كانی عێراق توانیان له‌ماوه‌ی چه‌ند هه‌فته‌یه‌ك له‌شه‌ڕی موسڵ، ده‌وروبه‌ری شاره‌كه‌ كۆنترۆڵ بكه‌ن‌و هێزه‌كانی دژه‌ تیرۆر چوونه‌ به‌ری خۆرهه‌ڵاتی شاره‌كه‌و چه‌ندین گه‌ڕه‌كیان كۆنترۆڵ كرد، به‌ڵام شه‌ڕه‌كه‌ ئاڵۆز بوو پاش ئه‌وه‌ی گۆڕا بۆ شه‌ڕی كۆڵان به‌كۆڵان له‌نێو هه‌زاران دانیشتووی بێ تاواندا.

 



هه‌ڵبژاردن له‌عێراق ناكرێت

له‌ 10ی تشرینی دووه‌مدا كۆمسیۆنی باڵای هه‌ڵبژاردن دواخستنی هه‌ڵبژاردنی ناوخۆیی له‌وڵاتدا بۆ ساڵی 2018 راگه‌یاند له‌بری واده‌ ده‌ستووریه‌كه‌ی كه‌ نیسانی 2017 یه‌، دواخستنی هه‌ڵبژاردنه‌كان به‌بڕیارێكی سێ سه‌رۆكایه‌تیه‌كه‌ی وڵات (سه‌رۆكایه‌تی كۆمار، سه‌رۆكایه‌تی حكومه‌ت‌و سه‌رۆكایه‌تی په‌رله‌مان) هات، ئه‌مه‌ش بۆ یه‌كه‌مجاره‌ له‌دوای ساڵی 2003وه‌ هه‌ڵبژاردنی تێدا دوا ده‌خرێت، چه‌ند سیاسیه‌ك هۆكاری دواخستنی هه‌ڵبژاردنیان بۆ كۆنترۆڵكردنی چه‌ند شارێك له‌لایه‌ن داعشه‌وه‌ گه‌ڕانده‌وه‌ كه‌ دانیشتوانه‌كه‌یان ناتوانن به‌شداری ده‌نگدان بكه‌ن، ئه‌مه‌ جگه‌ له‌ملیۆنان ئاواره‌ی شاره‌كان كه‌ ناتوانن به‌شداری هه‌ڵبژاردن بكه‌ن، هه‌روه‌ها سه‌رقاڵی حكومه‌ت به‌شه‌ڕی دژ به‌توندڕه‌وان، رێككه‌وتنیش له‌سه‌ر ئه‌وه‌ كراوه‌ كه‌ هه‌ڵبژاردنی ناوخۆیی له‌گه‌ڵ هه‌ڵبژاردنی په‌رله‌ماندا له‌2018 به‌ڕێوه‌بچێت.

 



هێرش كردنه‌ سه‌ر "ئه‌لشه‌رق ئه‌لئه‌وسه‌ت"

 

له‌ 20ی تشرینی دووه‌مدا رۆژنامه‌ی ئه‌لشه‌رق ئه‌لئه‌وسه‌تی سعودی راپۆرتێكی به‌ناونیشانی "نه‌ته‌وه‌ یه‌كگرتووه‌كان هۆشداری له‌حاڵه‌ته‌كانی دووگیانی نا شه‌رعی له‌كه‌ربه‌لا ده‌دات" بڵاوكرده‌وه‌ وه‌ك ئاماژه‌یه‌ك بۆ ملیۆنان سه‌ردانیكه‌ری له‌ناوه‌وه‌و ده‌ره‌وه‌ی عێراق كه‌ هه‌موو ساڵێك روو له‌و شاره‌ ده‌كه‌ن بۆ یادكردنه‌وه‌ی كوژرانی حسێنی كوری عه‌لی نه‌وه‌ی محه‌مه‌دی پێغه‌مبه‌ر 1400 ساڵ له‌مه‌وبه‌ر، دواتر ده‌ركه‌وت كه‌ راپۆرته‌ رۆژنامه‌وانیه‌كه‌ پشتی به‌راگه‌یه‌ندراوێكی ساخته‌ی رێكخراوی ته‌ندروستی جیهانی به‌ستبوو، هه‌واڵه‌ درۆكه‌ش بۆ چه‌ند رۆژێك بووه‌ جێبایه‌خی عێراقیه‌كان‌و داوایانكرد رۆژنامه‌كه‌ بدرێته‌ دادگاو كارمه‌نده‌كانیشی ده‌ربكرێن، له‌ئه‌نجامی ئه‌وه‌شدا ئه‌و رۆژنامه‌نووسه‌ عێراقیانه‌ی كاریان له‌رۆژنامه‌كه‌دا ده‌كرد له‌ترسی ژیانیان ده‌ستله‌كاركێشانه‌وه‌ی خۆیان راگه‌یاند ئه‌ویش دوای ئه‌وه‌ی هه‌ندێكیان هه‌ڕه‌شه‌ی كوشتنیان لێكرا.




    

 

كچان له‌ناوه‌ڕاستی به‌غدا پایسكیل لێده‌خوڕن

 

له‌ 5ی كانونی یه‌كه‌مدا كۆمه‌ڵێك له‌كچانی به‌غدا ده‌ستپێشخه‌ریه‌كی مه‌ده‌نیانه‌یان به‌ناوی "من كۆمه‌ڵگه‌م" راگه‌یاند بۆ پشتیوانیكردنی ژنان له‌به‌ده‌ستهێنانی ماف‌و ئازادیه‌كاندا، ئه‌و كچانه‌ شێوازێكی داهێنراویان بۆ ده‌ستپێكردنی ده‌ستپێشخه‌ریه‌كه‌یان به‌كارهێنا ئه‌ویش له‌ڕێی لێخوڕینی پایسكیل له‌شه‌قامه‌كانی به‌غدا  بوو كه‌ دیارده‌یه‌كی نامۆیه‌ له‌كۆمه‌ڵگه‌ی عێراقیداو بووه‌ جێی بایه‌خی تۆڕه‌ كۆمه‌ڵایه‌تییه‌كان.


 









ده‌ركردنی مالكی له‌باشووری عێراق

له‌12ی كانونی یه‌كه‌مدا نوری مالكی سه‌رۆك وه‌زیرانی پێشووی عێراق سه‌ردانی پارێزگاكانی باشوور میسان، به‌سره‌و ناسریه‌ی كرد، به‌ڵام رووداوه‌ چاوه‌ڕواننه‌كراوه‌كه‌ ئه‌وه‌ بوو كه‌ به‌هه‌زاران خۆپیشانده‌ر له‌لایه‌نگرانی سه‌ركرده‌ی شیعه‌ موقته‌دا سه‌در دژی سه‌ردانه‌كه‌ رژانه‌ سه‌ر شه‌قام‌و ده‌یان كه‌سیان له‌میسان هه‌ڵیانكوتایه‌ سه‌ر یه‌كێك له‌هۆڵه‌كان كه‌ مالكی لێ ئاماده‌بوو بۆ پێشكه‌شكردنی وتارێك‌و هه‌وڵیاندا ده‌ستدرێژی بكه‌نه‌ سه‌ر، به‌ڵام هێزه‌ ئه‌منیه‌كان رێگریان لێ كردن، دوای ئه‌وه‌ش مالكی هه‌ڕه‌شه‌ی ئه‌نجامدانی ئۆپه‌رسیۆنێكی سه‌ربازی له‌دژ لایه‌نگرانی موقته‌دا سه‌در كرد بۆ ته‌مبێكردنیان.

 

 


    راپۆرتی‌: موسته‌فا حه‌بیب له‌به‌غدا
    گرافیك‌و كاره‌ هونه‌رییه‌كان: ڤیرۆنیكا مانچێگۆ
    فۆتۆكان: گێتی‌ ئیمه‌یج، یوتیوب، فه‌یسبووك

 

بۆ خوێندنه‌وه‌و داگرتنی‌ ده‌قی‌ ته‌واوی‌ راپۆرته‌كه‌ به‌تێكست.. لێرە..كلیك بكه‌

Tweet